Pas takimit me presidenten Vjosa Osmani, kreu i Aleancës për Ardhmërinë e Kosovës, (AAK), Ramush Haradinaj, tha se në takim u ka kërkuar nga  partitë politike të sqarojnë nëse e kanë shumicën.

Haradinaj tha se partia e tij mbetet e përkushtuar që zgjedhjet parlamentare të zhvillohen brenda afatit kushtetues.

Sipas tij, kryetari  Vetëvendosjes, Albin Kurti ka kërkuar disa ditë kohë, për të parë nëse mund ta bëjë shumicën në tentimin e dytë për formimin e qeverisë, raporton Arbresh.info.

“Në takimin e sotëm, Presidentja kërkoi nga ne të sqarojmë se a e kemi shumicën për qeveri, dikush nga ne nëse e ka dhe kërkoi të gjendet zgjidhje e përkohshme për buxhetin dhe fondin nga BE…Kurti nuk ishte i qartë se a është vetë mandatar, apo e propozon veten. Situatë jo e lehtë për Presidenten”, deklaroi Haradinaj.

Ai tha se vendi po shkon drejt zgjedhjeve parlamentare, teksa si datë që tha se e cilëson si të përshtatshme për zgjedhje është 7 dhjetori.

“Kërkoi edhe disa ditë, që nuk ishte shumë serioze si kërkesë, megjithatë Presidentja ka afat deri më 5 nëntor., Besoj që me 5 nëntor do ta marrim edhe lajmin që do të shpërbëhet parlamenti…Data 7 dhjetor do të ishte opsion, me ia kursy Kosovës një jave”, tha Haradinaj./Arbresh.info/